Kanchan Wali Kaya

कंचन वाली काया सैलानी में तो पावणा एक दिन जावाला पाछा कोणी आवाला ॥ टेक ॥ बोलो बोलो अमृत वाणी इन मुखड़ा सु फूलां वाली परमल सोड़ा अमर पद पावाला ॥1॥ लेनो वेतो ले लो रे लावो इन हाथा सु करलो भलाई वालो काम जगत जस पावाला ॥2॥ मिलनो वेतो मिल लो रे जगत का मिनखड़ा सु मेलो ओ बिछड़ियो जाए पाछे पछतावा ला ॥3॥ गाना वेतो गा लो रे गुरुजी वाला गीत ला भैरव भजमन रा अमर हो जावाला ॥4॥ कंचन वाली काया सैलानी में तो पावणा एक दिन जावाला पाछा कोणी आवाला ॥5॥