Kheda Ki Maina Gujari

खेड़ा की मैना गुजरी र बाबा भैरू न मनाबा आई रे ॥ टेक ॥ पहली तो र भैरू आतो र जातो तने अब काई डाकन खागी म्हारा भैरूजी मैं तने मनाबा आई रे ॥1॥ सासू जी बतावे मने जन्म बांझड़ी म्हारो सूसरो देव छ म्हाने गाल म्हारा भैरूजी मैं तने मनाबा आई रे ॥2॥ पीहर का गेला म भैरू थारो र देवरो आती जाती तो द्यूलि थारे ढोक म्हारा भैरूजी मैं तने मनाबा आई रे ॥3॥ एक पुत्र के कारण र भैरू ल्याई दाढ़ी आलो अमर्यो भोग म्हारा भैरूजी मैं तने मनाबा आई रे ॥4॥ कदे न ओढयो पीलो पीहर को र भैरू कोन खाई कहे सटवा सूठ म्हारा भैरूजी मैं तने मनाबा आई रे ॥5॥ सासू के लगा दे भैरू चोसठ जोगणी नन्दूली क बावन भूत म्हारा भैरूजी मैं तने मनाबा आई रे ॥6॥ छोरो हुयो न म्हारे छोकरी र भैरू कोन आई म्हारी मोटी सारी तून्द म्हारा भैरूजी मैं तने मनाबा आई रे ॥7॥ गावे बजावे भैरू बीना र भामणी या तो गावे गावे विनत लगा र म्हारा भैरूजी मैं तने मनाबा आई रे ॥8॥